Novembro: mes da ciencia en galego

 

Entramos na última semana de novembro, o mes no que reivindicamos a ciencia en galego, que no noso cole e na nosa biblioteca se fai durante todo o ano. Compartimos o manifesto deste ano, escrito por José Tubío, profesor, investigador e divulgador na USC, que reclama a necesidade de coñecer a historia da ciencia. 

Manifesto 2022

O manifesto refírese á Real Expedición Filantrópica da Vacina da variola, un feito científico épico que se levou a cabo entre 1803 e 1806 e foi recollido en diferentes obras, entre as que destacamos Os nenos da Variola de María Solar. A compañía Pérez e Fernández realizou unha adaptación teatral da obra de María Solar, que poderemos ver no Auditorio de Rianxo o vindeiro venres 9 de decembro. Tal e como expoñen na páxina da compañía: «Os nenos da varíola é un proxecto escénico de divulgación científica, memoria histórica e de posta en valor dunha muller pioneira esquecida pola historia: Isabel Zendal.» 

Estamos de sorte: divulgación científica, memoria historica, igualdade e teatro. Non podemos pedir máis! 

25 N

Hoxe conmemoramos no colexio o Día contra a Violencia de Xénero. Despois de dúas semanas de traballo nas titorías e na Aula de Música, coordinados polo Equipo de Tics, hoxe xuntámonos na biblioteca para ver o vídeo que recolle o traballo realizado: a Canción sen medo interpretada pola nenas do colexio e as imaxes dos carteis cos que poñemos de manifesto o noso NON! á violencia machista. 

Parabéns a todos e a todas! 

Que conmemoración tan emocionante compartimos!

Mochilas Viaxeiras: 4º Viaxe

Hoxe saíron de novo ás Mochilas Viaxeiras; nin a chuvia as para! Tedes nas casas un bo feixe de libros, música e unha peli para estes días grises e húmidos. Gozade delas á quenturiña!

A miña profe é un monstro

Carla Fungueiriño, Carla Rial e Irene contáronnos este mércores A miña profe é un monstro de Peter Brown. 

Non sabemos se foi pola sona das contadoras, pola identificación co título ou porque segue a chover sen parar, pero a biblioteca estaba chea de público que quería escoitar a divertida historia da relación entre un alumno e a súa profe. Dá gusto volver a ver a biblioteca chea, de historias e de nenos e nenas. 

Grazas, Carla, Irene e Carla! Fixestelo xenial e escollestes un conto ben divertido, que, aínda que poida parecer o contrario, gústalle moito aos nenos, ás nenas e ás mestras 😉

Detrás das Mochilas Viaxeiras

Detrás das Mochilas Viaxeiras hai moito traballo, do equipo da biblio e dos axudantes da BBS. Cada dúas semanas vemos esta actividade frenética 😉 dos nosos axudantes. Que son 10 mochilas viaxando! 10 mochilas para revisar e sortear! 👏👏

Escritores e escritoras

En Sexto están a investigar sobre os autores e autoras dalgúns dos libros que levan en préstamo cada semana e despois comparten o que descubriron co resto da clase. Aproveitan para recomendar algunhas das súas lecturas favoritas ou para explicar porque algunhas non lles gustaron.

Viaxes e viaxeiros

Comezamos a compartir o traballo que as diferentes clases están a realizar no marco do Proxecto Documental Integrado deste curso: Viaxes e viaxeiros. 

Na clase de 3º están viaxando a través da arte e a súa primeira parada foi a obra de Vincent Van Gogh. Mirade que presentación tan chula compartiron na entrada da BBS. 

Moi ben 3º, sodes uns artistas!

Frauta de auga

Grazas, Segundo, por explicarnos tan ben como facer unha frauta de auga, que, xa escoitamos, soa de marabilla. Teremos que probar a facela. 

Parabéns polo traballo e polo vídeo, Segundo! 😍

Recreos na BBS

Club dos cogomelos

Cousas bonitas que se fan no cole, ciencia en galego, en novembro e ao longo de todo o curso. Bravo 2º!

Visitas Máis ca leña

Este curso si! Xa podemos ofertar as visitas á área do proxecto Máis ca leña, guiadas polo alumnado de 5º e 6º.

Xornada de Bibliotecas Escolares de Galicia 2022-2023

 

Hoxe celébrase en Santiago a Xornada de Bibliotecas Escolares de Galicia, un encontro para falar sobre lectura e escritura, sobre o papel das bibliotecas na alfabetización en todo tipo de linguaxes, sobre proxectos, sobre cooperación, sobre creación... sobre as aprendizaxes que agroman nas bibliotecas escolares. Alí estaremos!

5º equipo de axudantes

Xa están en funcionamento todos os equipos de axudantes deste curso. Que sorte temos! Con que ganas comezaron todos e como se están a implicar! Esta semana revisaron, sortearon e repartiron Mochilas Viaxeiras, fixeron un directo da Radio BBS, colocaron libros nos andeis, axudaron aos pequenos/as... Bravo, axudantes!

Mochilas Viaxeiras: 3ª viaxe

 

Saíron de novo as Mochilas Viaxeiras! Lecturas, música e pelis escollidas para que as desfrutedes en familia. 

Daniela Pirata e a bruxa Sofronisa

 

Mércores, día de contacontos na BBS! Pouco a pouco imos volvendo ás rutinas que tanto nos gustaban. 

Hoxe Minia e Candela trouxéronnos unha historia de piratas, de amistade, de igualdade e de respecto: Daniela Pirata e a bruxa Sofronisa de Susanna Isern e Gómez. 

Gústanos moito esta Daniela Pirata, que está entre as novidades da BBS. 

Estupendas contadoras estas rapazas de Quinto; como botabamos en falta os contacontos! 😍

Bravo, contadoras!

4º equipo de axudantes

 Foi unha semana curtiña, pero elas traballaron moito e moi ben 😍