A tartaruga que quería durmir

Esta semana Nerea e Rita contaron  A tartaruga que quería durmir de Roberto Aliaga e Alessandra Cimatoribus, nos nosos recreos lectores. Levaban agardando moito tempo, porque este trimestre son moitas as familias que están a participar nos contacontos, pero pagou a pena, pola historia que escolleron e polo ben que o fixeron. Conseguiron "engancharnos" por completo nas aventuras e desventuras da tartaruga que quería durmir.

Moi ben, contadoras!

As maquetas da BBS

E xa van cinco cursos participando no Salón do Libro Infantil de Pontevedra!
No Mes das Letras, sacamos as cinco maquetas cos seus libros á entrada do colexio, porque nós tamén somos creadores e creadoras das Letras Galegas.
A motora de Cambeses, O Nautilus, a batea, Castelao e Maruja Mallo e a antiga cámara de cine son unha boa mostra.

Na BBS tod@s contamos: Rosa e Rita

Continuamos recibindo familias que veñen compartir contos na BBS. Este venres foron Rita e a súa nai, Rosa. Escolleron O soño do osiño rosa de Roberto Aliaga e Helga Bansch, unha historia que fala da importancia de perseguir os soños, que son diferentes como diferentes somos tod@s. Preciosa a historia e as ilustracións, máis aínda ao ser contada co agarimo co que Rosa e Rita o fixeron. 

Moitas grazas, contadoras!  

Un pracer ver como medra a familia de contador@s da BBS.

Festival das Letras Galegas

Un ano máis, a aula de Música organizou o Festival das Letras Galegas, implicando a todo o alumnado do centro, facendo cultura, mantendo viva a nosa lingua e a nosa tradición. Parabéns a tod@s polo esforzo e o bo facer que compartistes con nós desde o escenario. Parabéns, José Luis, polo día a día do traballo da aula de Música.

1º e 6º

2º e 3º

3º

Nereida

4º

5º

6º

Recta final das Mochilas Viaxeiras

Este mércores saíron de novo as Mochilas Viaxeiras, xa non para todos os cursos, só para os mais numerosos, nos que aínda hai lector@s agardando por elas "ansiosamente" 😉

Boas Lecturas!

Na foto faltan os de 6º que estaban de visita no IES Felix Muriel e colleron as Mochilas pola tarde.

Irene ten claro que foi o que máis de gustou de todo o que a Mochila Viaxeira levou ata a súa casa.

Na BBS tod@s contamos: Alexia e Yoli

Hoxe Alexia e a súa nai, Yoli, foron as contadoras dos recreos lectores da BBS. Xa son veteranas e dá gusto volver telas de novo compartindo historias con nós. Desta vez léronnos "man a man" Un can e un gato de Paula Carbonel e Chené Gómez. 

Un can e un gato coñecéronse.

O gato dixo: Miau! O can dixo: Guau!

Pero non se entenderon.

Así comeza a historia de dous amigos que ás veces se entenden e ás veces non, que ás veces berran e ás veces non, como pasa en calquera historia de amig@s, irmáns, compañeir@s... Hoxe na biblio sorrimos cun conto sobre a amistade, o respecto ás diferenzas e a tolerancia.  Grazas Yoli, grazas Alexia!

Grazas, contadoras!

Xa está na casa!

Recén chegada de Pontevedra! Agora a gozar dela en Taragoña 😀

Mª Victoria Moreno, o amor pola lingua

Este luns asistimos a un espectáculo de contacontos baseado na figura de Mª Victoria Moreno, organizado polo Servizo de Normalización Lingüística do Concello de Rianxo. A sesión estivo a cargo da actriz, contadora e escritora Soledad Felloza, quen fixo, por medio dos contos,  un percorrido por parte da obra da escritora homenaxeada nas Letras Galegas 2018. 

Foi un luxo poder seguir descubrindo o mundo literario de María Victoria Moreno da man dunha narradora da calidade de Soledad Felloza.

Na BBS tod@s contamos: Antonio e Rafa

Hoxe Rafa e Antonio, o seu pai, estiveron contándonos un conto na BBS. Eles xa

son expertos, levan cursos participando nos contos do recreo, e para nós é unha ledicia seguir contando con eles.

Desta vez escolleron Superar el listón de Victoria Pérez Escrivá, unha historia cun elefante e un canguro como protagonistas, que nos fala da importancia de coñecernos e aceptarnos tal e como somos. Imposible non sorrir coas aventuras e desventuras deste elefante. Grazas, Antonio e Rafa polo conto, que non coñeciamos e pola "fidelidade" coa BBS. 😉

Plataforma de Libro Electrónico

A Biblioteca Brea Segade forma parte do proxecto ELBE2, lectores electrónicos nas bibliotecas escolares, que busca introducir os dispositivos de lectura dixital nas bibliotecas dos centros escolares e facilitar ao alumnado oportunidades de achegamento ao libro dixital, nun contexto de aprendizaxe e coa guía do profesorado. Dentro dese proxecto, na BBS contamos, xa hai un tempo, con catro lectores electrónicos que están a ser usados nas aulas.

Este curso a Asesoría de Bibliotecas Escolares da Xunta de Galicia creou unha Plataforma de préstamo de libros electrónicos, que se atopa en fase piloto, e se ofertou a 50 bibliotecas escolares de toda Galicia, entre elas á BBS. Estamos empezando a coñecer a Plataforma, a darnos de alta, facer os primeiros préstamos... 
Pinta moi ben! Seguirémosvos contando.