Hoxe cantamos e puxemos os maios no cole. Tivemos a sorte de que Alma, Jose Luís e Tino pasaron por todas as aulas traéndonos o ramo e animándonos a cantar os maios rianxeiros.
Meigas fóra e coronavirus fóra!
Para o ano todos xunt@s no patio cantando.
 |
| Bravo polos músicos! |
Carlos, Froilán e Hugo comparten con nós Paco de Paula Carballeira. Vós non faríades calquera cousa por un anaquiño da vosa comida favorita? Paco si! Moi ben, contadores!
A Aula de Música do CEP Brea Segade, en colaboración co Servizo de Normalización do Concello de Rianxo, vén de publicar unha páxina con información sobre os maios rianxeiros: historia, recollidas, letras, partituras e versión en karaoke e MP3, para que poidamos cantar e celebrar os maios tradicionais en todos os centros educativos do concello e tamén nas casas.
No Brea temos a fermosísima experiencia do curso pasado de cantar Ei vén maio desde as casas, este ano farémolo tamén no cole. 😃
Entrade na páxina dos maios rianxeiros e ide preparándovos, que "Ei vén maio"!
Aquí vai a copla que os rapaces e rapazas de 5º e 6º lle botaron aos compañeiros e compañeiras do CEIP A.D.R Castelao de Rianxo, despois de escoitar a que eles nos mandaran. Gustounos isto de regueifar entre coles.
Grazas, David, técnico de Lingua do Concello de Rianxo, por pasarnos o vídeo. 😉
O obradoiro con Lupe Blanco e Josiño da Teixeira saiu no Fun polo aire da TVG, entrade neste enlace para velo, saímos no minuto 31:17.
Terceiro e Cuarto levaron a cabo un proxecto sobre As Meninas de Velázquez na Sección Bilingüe, na materia de Plástica. Como remate do proxecto deseñaron as súas propias versións das Meninas, que despois pasamos a formato 3D e imprimimos na nosa impresora. Este venres puideron ver o resultado, meninas convertidas en pins personalizados.
Que bo traballo, Terceiro, Cuarto e Yoli!
Parabéns!
No Día do LIbro saíron as Mochilas Viaxeiras coa novidade de que en 3º e 5º pasaron a ser dúas, garantindo así que chegarán a todas as casas antes de final de curso 😃
Boas lecturas a todos/as!
O venres o alumnado de Terceiro participou no obradoiro "Xoga, crea e aprende idiomas" impartido por Paola Guimeráns. Neste obradoiro traballaron con Scratch e a placa MaKey MaKey. Con Scratch aprenderon a programar e con MaKey MaKey viron como converter case calquera obxecto nun teclado alternativo. Usando materiais cotiáns, crearon e xogaron a un videoxogo para aprender vocabulario en inglés, castelán e chinés. O obradoiro forma parte dunha investigación sobre tecnoloxía e idiomas na que está participando Paola. Os nenos e nenas de Terceiro tiveron a sorte de poder participar desde a Aula de Inglés.
Grazas, Paola! Canto aprendemos contigo!
"As palabras son ...bolboretas que viran alto no ceo."
Margarita Engle
Hoxe , na Hora de Ler, cada clase veu o vídeo A música das palabras e despois sacamos os nosos libros ao patio e lemos. O día non nos acompañou, pero aínda así, enchemos os espazos cubertos de libros e lecturas.
A Música das Palabras
Cando
lemos, á nosa mente médranlle ás.
Cando escribimos, os nosos
dedos cantan.
As
palabras son golpes de tambor e frautas na páxina,
paxaros
voadores e elefantes trompeteiros,
ríos que flúen, fervenzas
que caen,
bolboretas que viran
alto no ceo!
As
palabras convídannos a bailar
ritmos, rimas, latexos do
corazón,
cascos e bater de ás, contos antigos e
novos,
fantasías e verdades.
Esteas
cómodo na casa
ou atravesando veloz as fronteiras cara unha
nova terra
e unha lingua estraña, as historias e
poemas
perténcente.
Cando
compartimos palabras, as nosas voces
vólvense música do
futuro,
paz, alegría e amizade,
unha melodía
de
esperanza.
Escrito
por
Margarita Engle
Traducido
por María
Canosa
Os grupos de 5º e 6º participaron hoxe nun obradoiro de regueifa con Josiño da Teixeira e Lupe Blanco. Rianxo é un dos concellos que impulsa o proxecto educativo Enreguéifate!, que busca promover a improvisación oral en verso e en lingua galega, por medio da difusión da regueifa.
Rapaces e rapazas do IES Félix Muriel, do CEIP Ana Mª Diéguez, do CEIP A.D.R. Castelao e do CEP Brea Segade participaron neste obradoiro e aprenderon a compoñer coplas seguindo a tradición da regueifa en Galicia. Ata se botaron coplas dun centro a outro! 😃
Grazas a Lupe Blanco e Josiño da Teixeira por contaxiarnos a paixón pola regueifa e grazas ao Concello de Rianxo por esta iniciativa.
Chegaron as Mochilas Viaxeiras de volta á BBS e trouxéronnos novas imaxes dos vosos recunchos e lecturas favoritas.
Grazas a Breixo, Daniela e Ezequiel e ás súas familias por deixarnos ver eses estupendos espazos para ler. Tamén hai quen dixo que lle gusta ler en calquera lado 😍 Estupendo!!
Remataron os Encontros do Plan de Mellora das Bibliotecas Escolares. Foron dúas tardes intensas, de formación de calidade, nas que puidemos escoitar a algúns dos máis importantes expertos/as en lectura e bibliotecas como Cristina Novoa, Daniel Cassany, Alicia Sellés, Blanca Mata, Estrella Borrego ou Joan Ferrés e tamén descubrir algunhas das interesantes experiencias que se están a desenvolver nos centros Plambe.
Precisamos de formación para continuar avanzando nos nosos proxectos de biblioteca, para seguir ofertando día a día espazos, lecturas e propostas de calidade a alumnado, profesorado e familias, desde a escola pública. O Plambe, entre outras moitas cousas, ofrécenos esa formación necesaria para non perder o Norte e para renovar a ilusión e as ganas de traballar desde as bibliotecas escolares.
O peche destes Encontros foi un luxo, a entrevista da xornalista Susana Pedreira á escritora Irene Vallejo, que nos deleitou coas súas palabras sobre a oralidade, o libro e a lectura.
Grazas á Asesoría de Bibliotecas Escolares por estes Encontros.
Grazas por contar coa Biblioteca Brea Segade para compartir a nosa experiencia ao redor da lectura.
Esta semana a aula de Sexto colocou os carteis elaborados por Segundo e Sexto para concienciar sobre a importancia de non deitar lixo no monte e de facer un uso responsable dos espazos naturais. Bo traballo, rapaces e rapazas!
No blog de Sexto: Lixo non!
O alumnado de 5º e 6º participou estas últimas dúas semanas nun obradoiro de educación afectiva e sexualidade, impartido pola psicóloga Natalia Guedellas. O título do obradoiro é Quererse ben e traballouse sobre sexo e xénero, afectividade, coñecemento e valoración dun mesmo/a para poder coñecer e respectar aos demais: quererse ben a un mesmo/a e querer ben aos demais.
O obradoiro resultou moi interesante e dou pé a moitas reflexións e debates que terán continuidade nas aulas, porque a educación afectiva e a sexualidade deben estar presentes na Educación Primaria de xeito consciente, para evitar a desinformación e os tópicos.
Grazas, Natalia!
