De plantación

Tiñamos previsto ir plantar na mañá do venres, o Día de Rosalía, pero a chuvia non deu tregua e tivemos que adialo. Hoxe non choveu e alá marchamos de plantación todo o alumnado e profesorado do Brea, como xa é tradición.  Subimos á caseta das cabuxas para plantar carballos, castiñeiros, cerdeiras e un freixo. Como cada curso, colaboramos coa Comunidade de Montes o Fieitoso de Taragoña e o Colectivo Veciñal Fousas ao Monte para que a nosa contorna, o noso monte, manteña a biodiversidade e que, pouco a pouco, aumente a cantidade de frondosas autóctonas no monte de Taragoña. 

Grazas a Emilio, Marina, Luís e Carlos, a Comunidade de Montes e a Fousas ao Monte, por acompañarnos e axudarnos a plantar e a entender a importancia do que estamos facendo, ano tras ano. 

Viva o noso monte! 

Grazas, Fousas!

 

De romaría!

Onte fomos de romaría, á II Romaría das Fousas. Todo o cole colaborou con debuxos para a decoración de Filgueiras, que luciu onte coma nunca, grazas á limpeza que fixeron nas semanas pasadas a Comunidade de Montes, o Concello de Rianxo e o colectivo Fousas ao Monte. Ao longo do día moitas familias do Brea Segade desfrutaron das actividades programadas: xogos, faladoiro, obradoiros, música... Foi todo un éxito.

                            Parabéns Fousas ao Monte! Longa vida á Romaría das Fousas!

Premios Fousas ao Monte

 

😍

Onte, na II Romaría das Fousas, o CEP Brea Segade foi agasallado cun dos premios Fousas ao Monte polo seu traballo de divulgación e educación no eido medioambiental. 

Moitas grazas aos compañeiros e compañeiras de Fousas, polo premio e, sobre todo, polo voso traballo e por contar co noso colexio para colaborar con vós e para desenvolver proxectos tan interesantes como "Máis ca leña". 

Tamén foron premiados a Comunidade de Montes de Baroña e Mariano Saborido, un orgullo compartir premio con vós. 

II Romaría das Fousas

 

Non faltedes!!

Máis ca leña: 5º

Onte retomamos as visitas do proxecto Máis ca leña. Foi un día importante, a aula de 5º realizou a súa primeira visita guiada, despois de meses de traballo sobre os diferentes espazos e recursos que podemos atopar no itinerario de Máis ca leña. Estreáronse co alumnado e profesorado do Obradoiro de Emprego en Xestión Forestal de Boiro. 

Bravo, 5º! Fixéstelo de marabilla! Agora a continuar aprendendo sobre o noso monte para compartilo con máis  visitantes que irán chegando a área de Máis ca leña.

Grazas ao Obradoiro de Emprego de Boiro polo seu interese no proxecto e polo apoio aos rapaces e rapazas do Brea Segade que guían as visitas. 

Plantación en Filgueiras

Hoxe as aulas de 2º, 3º, 5º e 6º participaron nunha plantación de árbores autóctonas en Filgueiras. Un ano máis, colaboramos coa Comunidade de Montes o Fieitoso de Taragoña e co colectivo Fousas ao Monte para continuar plantando frondosas no noso monte. Desta vez foron freixos e castiñeiros, que doou Ismael Alonso, da Torre.  

Emilio Saborido organizou o traballo, lembrounos a importancia das frondosas, para garantir a biodiversidade e para loitar contra o lume, e foinos explicando unha chea de cousas sobre a propiedade en mancomún, as especies autóctonas, os fungos... Canto aprendemos sempre con Emilio! Acompañáronnos Nati, Miguel e Chimpín, membros de Fousas ao Monte, e tamén Paquita, que baixou ata Filgueiras para supervisar o traballo. 😍

Grazas á Comunidade de Montes e a Fousas ao Monte. 

Grazas, Emilio, Nati, Miguel, Chimpín e Ismael. 

Castiñeiro

Freixo

O monte é noso!