28 de maio de 2022

Basket Beats Borders

O xoves pasado o alumnado de 5º e 6º tivo unha charla con Adrián Dios, profesor da Universidade de Santiago de Compostela e membro da Agrupación Deportiva de Baloncesto Fontiñas. Presentoulles o proxecto: Basket Beats Borders O baloncesto derruba fronteiras. Adrián acaba de chegar de Beirut, no Líbano,  onde estivo coñecendo o proxecto e adestrando ao Palestine Youth Basket Team, un equipo de baloncesto feminino formado por refuxidas palestinas do campo de Shatila. Por medio de imaxes e vídeos presentounos a dura realidade de Shatila, pero tamén a incrible experiencia pola que se creou un espazo de liberdade e esperanza para un grupo de rapazas e nenas que teñen no baloncesto unha vía de escape e de superación persoal. 

Para saber máis sobre o proxecto entrade en calquera destas dúas publicacións ou na páxina Basket Beats Borders, paga a pena. 

Reportaxe sobre BBB, contado por Adrián, en Nós Diario 

BBB no xornal El salto diario

Adrián tamén nos falou dos encontros do equipo das adultas con equipos femininos europeos. En xuño estarán en Madrid e está funcionando unha campaña de recollida de cartos para facer posible a viaxe e a estancia. 

Para  colaborar na campaña de finanzamento da viaxe a Madrid no mes de xuño: Basket Beats Borders. Encontro Madrid Shatila

Estaremos atent@s ao proxecto e as iniciativas nas que, como centro e comunidade escolar, poidamos participar. 

Grazas, Adrián por descubrirnos un proxecto tan fermoso!

24 de maio de 2022

Encontro con Pere Tobaruela

Hoxe Pere Tobaruela estivo na BBS. Comezou falando co alumnado de 5º e 6º, seguiu con 3º e 4º e rematou cos de 1º e 2º. Mañá intensa na BBS! Falou sobre os libros que se leron en cada aula, pero sobre todo falou sobre o seu traballo como escritor e o seu compromiso coa literatura na nosa lingua. Explicounos que cando escribe ten sempre presente como "enganchar" aos lectores/as e hoxe enganchounos a todos/as coa súa charla amena, divertida e cercana. 

Grazas, Pere, polos teus libros e 

polo tempo que hoxe compartiches con nós! 

Seguirémos véndonos nos libros!

23 de maio de 2022

Toupiciencia

Hoxe a nosa biblioteca encheuse de ciencia de man da Toupiña e do seu axudante Protonio. Os nenos e nenas de 1º, 2º, 3º e 4º tiveron a sorte de ver o espectáculo da Xanela do Maxín Toupiciencia, no que Protonio realizou para nós tres experimentos, seguindo o método científico, tal e como lle ensinou a Toupiña.  
Foi moi divertido e moi interesante. De seguro que hoxe nas casas houbo quen repetiu os experimentos. 
Grazas, Toupiña e Protonio! Encantounos! 
No Brea xa hai varios científicos e científicas do futuro, seguro. 😉
Grazas, Narciso! Grazas ao Consorcio Editorial.

Todos/as os que quedastes con ganas de máis ciencia e máis Toupiña, tedes neste enlace vídeos de divulgación científica creados pola Xanela do Maxín e protagonizados pola Toupiña. Entrade e seguide aprendendo con Toupiciencia.

21 de maio de 2022

Descubrindo o relevo

Na aula de Quinto, entre as actividades do PDI De viaxe!, estiveron traballando sobre xeografía e elaboraron maquetas nas que representan elementos do relevo de costa e de interior. Cada grupo presentou a súa maqueta, que agora están expostas na entrada do cole. 
O traballo coas maquetas no blog de Quinto.

Mochilas viaxeiras 15

Penúltima saída das Mochilas Viaxeiras! Só en tres clases quedan compañeiros e compañeiras agardando para levar as Mochilas ás súas casas. Xa queda menos!

Preparando o encontro con Pere Tobaruela

Neste trimestre todas as clases estiveron lendo e traballando sobre obras do escritor Pere Tobaruela. A vindeira semana teremos un encontro con el, así que estamos rematando os traballos ao redor da súa obra.

18 de maio de 2022

Concerto didáctico de jazz

Hoxe, para voltar con ganas despois da ponte, tivemos un concerto didáctico de música jazz no colexio. Alfredo Susavila, Carlos Bastón e Pachi Cruz, explicáronnos como naceu e evolucionou o jazz, usando diferentes temas musicais como mostra do que nos ían contando. Este concerto forma parte das actividades que se van desenvolver en Rianxo ao redor do festival Noites de Jazz, que se celebrará nos primeiros días de agosto. Un luxo poder escoitar a estes tres grandes músicos de jazz no noso colexio e comezar a entender e a gozar con este xénero musical, que tamén é para nenos e nenas. 
Grazas, Alfredo, Carlos e Pachi! 
Grazas ao Concello de Rianxo e á Escola de Música de Rianxo!

De viaxe polo Barbanza 14

As Mochilas Viaxeiras tamén voltaron despois da ponte das Letras Galegas e trouxéronnos novas recomendacións de lugares no Barbanza para visitar en familia. 

- A lagoa de Carregal. 

- A aldea maldita de Abuín. 

- O miradoiro da Curota. 

- O castro Barbudo.

- O faro de Corrubedo.

Grazas a tod@s polas vosas achegas nos Cadernos de Viaxe; grazas Mateo, Alejandro e as vosas familias polas fotos. 

Xa imos tendo un mapa ben completiño de visitas imprecindibles no Barbanza.