Libros que veñen e van 2024

Xa podedes pasar recoller as vosas bolsas de lectura de verán, os Libros que veñen e van. Lembrade, tedes que vir en familia, acompañados por un adulto/a e podedes levar ata 10 títulos para gozar da lectura tamén no verán. Animádevos!

De estrea!

Estamos de estrea na biblio, onte colocamos as esculturas literarias de cartón pedra elaboradas no obradoiro con Electra, dentro do programa Lectura e familia. Mirade que bonitísmas quedaron: 

Onte, ademais de colocar as esculturas, despedimos as actividades con familias cun xogo de busca de libros agochados nos andeis da BBS, cantando xunt@s e cunha pequena merenda. 

Grazas a todas as familias que participastes no programa Lectura e familias. 

Encántanos que veñades á biblioteca e vos impliquedes nas actividades. 

Grazas, Electra polo obradoiro de esculturas, que ben o pasamos e que bonita está a BBS coas novas esculturas!

Pasando a bóla. A banda dos insectos

Onte tivemos un espectáculo de títeres e teatro na nosa biblio. Celtia Figueiras, de A xanela do maxín, representou Pasando a bóla. A banda dos insectos, espectáculo baseado no seu libro, do mesmo nome, que trata sobre o acoso escolar. Contou coa colaboración de dez voluntarios e voluntarias de 5º, que representaron o que Celtia ía contando. Que ben o fixeron!

Falar sobre o acoso, o maltrato e os dereitos dos nenos e as nenas é imprescindible, para detectalo e evitalo. Facelo por medio dos contos e do teatro é fantástico porque axuda a identificar situacións que non sempre identificamos como acoso e facilita a reflexión e o diálogo. 

Grazas, Celtia! Grazas a Narciso e ao Consorcio Editorial 

que trouxeron "a banda de insectos" á BBS.

Mochilas Viaxeiras 13

Nada mellor para facer fronte a estes días de chuvia e vento que os libros das Mochilas Viaxeiras! Poñédevos á caloriña e a ler! Boa finde!

Mochilas Viaxeiras 12

 Mochilas do Mes dos Libros, para que sigades gozando en familia dunha pequena escolma dos fondos da BBS. 

Plan de rescate con Antía Yáñez

O xoves pasado o alumnado de 5º e 6º recibiu a visita da escritora Antía Yáñez para falar sobre Plan de rescate, obra que leron e traballaron nos últimos meses. O libro gustoulles moito e tiñan moitas ganas de poder comentalo coa súa escritora. Antía contestou a un montón de preguntas que tiñan preparadas e moitas máis que foron xurdindo na conversa. Rematou o encontro asinando libros. Quedámonos tamén coa boa nova de que pode haber unha segunda parte deste libro, que nos encantou.

Grazas Antía por Plan de rescate e pola túa visita!

Grazas, Uxía e Xerais, por facer posible estes encontros con escritoras. 

O día que choveron gatos, con Eva Mejuto

Hoxe Eva Mejuto estivo na nosa biblioteca para falar co alumnado de 3º e 4º sobre a súa obra O día que choveron gatos. Había moitas ganas de coñecela e de comentar o libro que estiveron lendo nas clases os últimos meses. Encántanos que nos visiten escritoras, falar con elas de libros, preguntarlles un montón de cousas sobre a súa obra, darlles a nosa opinión e... que nos asinen os libros 😍 

Grazas, Eva! 

Mochilas Viaxeiras 11

As primeiras mochilas viaxeiras do mes de abril. Boas lecturas!

Mochilas Viaxeiras 10

 As Mochilas tamén marchan de vacacións de Pascua e xa saíron hoxe!

Agardamos que ademais de descanso, viaxes, xogos, excursións, festas... teñades moi boas lecturas nestes días de lecer e que vos guste moito todo o que atopedes nas Mochilas Viaxeiras da BBS.

Mochilas Viaxeiras 6

Esta semana saíron 9 Mochilas Viaxeiras! As tres clases máis númerosas do colexio comezaron a recibir dúas mochilas, garantindo así que visitarán todas as casas antes de que remate o curso.

Para ler e crear banda deseñada

Un libro para agasallar 2023

Mochilas Viaxeiras 4

Saíron as Mochilas Viaxeiras do Nadal, que non volverán á BBS ata o 2024. Agardamos que vos gusten moito e que teñades moi bos momentos con elas ao longo das vacacións. 

Bebé bigotes

Antía Tarrío, Antía García, Alexandra, Valeria e Adam foron os contadores desta semana. Contáronnos Bebé Bigotes, unha divertidísima historia sobre unha parella que quería ter un bebé. Tiñan moitas ganas de participar nos contacontos do recreo e notouse, fixérono moi, moi ben. Hai canteira de contadores e contadoras! 😍

Xenial!

Mochilas Viaxeiras 3

 Xa imos pola terceira viaxe!

Superheroínas e superheroes: Manual de instrucións

Este mércores tivemos unha nova sesión dos contacontos do recreo. Daniela Agrafojo, Elsa, Leire, Sabela, Vera, Xoana e Daniela Tembra explicáronnos, ben polo miúdo, como converternos en superheroínas ou superheroes. 

Superheroínas e superheroes de Davide Calí e Gómez é un dos libros máis buscados e emprestados na BBS. Todo un éxito! Non sabemos se sodes as superhereroínas e superheroes que o buscades para repasar as instrucións ou se estamos a piques de ter unha nova remesa de superheroínas e superheroes no cole. 😉

Moi boa escolla e moi ben contado! Grazas contadoras!

Bravo!