O maio en Filgueiras

 

Este sábado 30 de abril, ás 11 da mañá en Filgueiras, xornada de limpeza do monte e como ben nos canta Emilio de 4º, boa oportunidade para recoller os maios. 

Animádevos! 

Entre todos/as logo rematamos o traballo.

O monte é noso!

Escornabots e Matemáticas

A aula de 2º está aproveitando o moito que aprenderon con Almu e Miguel no obradoiro de robótica para traballar as Matemáticas cos escornabots: táboas, numeración, xeometría... Os escornabots poden con todo! 😉

A folla azul en 3D

Ao ver o moito que estaba gustando en 5º e 6º A folla azul de Andrea Maceiras, decidimos facer follas 3D seguindo a ilustración de Sonia García. Andrea Maceiras xa levou a súa o día que veu visitarnos, esta semana rematamos a creación dunha folla azul para cada un dos lectores e lectoras de 5º e 6º, o libro ben o merece!

Vivan as uñas de cores!

Martes e mércores cambiamos de conto, Breixo, Hugo, Sara, Daniela e Adrián contaron aos compañeiros/as de 1º, 2º, 3º, 4º e 5º Vivan as uñas de cores! de Luís Amavisca. 

Volvemos a escoitar e ver contos como había moito tempo non faciamos, que gozada!

Grazas, Breixo, Adrián, Sara, Hugo e Daniela! 

Encantounos a historia!

Animais de compañía

Daniela, Diego, Lola, Hugo e Noela trouxéronos os contacontos de volta á biblioteca. Este martes foi un día emocionante na BBS, despois de dous cursos volvemos a compartir lecturas, en modo presencial 😃. 

Escolleron Animais de Compañía de Manuel Lourenzo, un conto que elaboraran e contaran con Kamishibai cando estaban en 2º de Primaria, hai xa catro cursos. Foi un fermoso xeito de retomar unha das actividades que máis nos gustan e que máis botabamos de menos. 

Ao longo desta semana e da seguinte,na Hora de Ler, alumnado de 6º e de 5º compartirá lecturas cos compañeiros e compañeiras de todos os cursos, para despedir o Mes dos Libros e comezar o Mes das Letras. Pouco a pouco imos volvendo á normalidade na BBS... 

Grazas, contadores e contadoras! 

Encantounos escoitar Animais de compañía!

Moi ben, Noela, Diego, Lola, Daniela e Hugo!

Día do Libro no Brea Segade

Entrevista a Andrea Maceiras

 

Este Abril, mes dos libros, estanos traendo cousas ben bonitas, como o encontro coa escritora Andrea Maceiras para falar da súa obra A folla azul, Premio Merlín de Literatura Infantil 2020, e parte do itinerario lector do 5º e 6º.

 

 

AQUÍ tedes a entrevista que lle fixeron na Radio BBS alumnas e alumnos de 5º e 6º.

Día Mundial do Libro 2022

Cartel e mensaxe da Consellería de Cultura, Educación e Universidade  para conmemorar o 23 de abril, Día Mundial do Libro e do dereito de Autor/a. Texto do escritor, editor e tradutor, Xosé Ballesteros, que se centra na parte menos visible do libro: editoriais, imprentas e librarías, que fan posible que as creacións de escritores/as e ilustradores/as cheguen aos lectores/as e ás bibliotecas. 

Feliz Día do Libro!

Mochilas Viaxeiras 13

Chegar e marchar! As Mochilas Viaxeiras xa están nos seus novos destinos, e van quedando menos!

Preparativos

Estade atentos/as, na BBS estase argallando algo...

De volta na Radio BBS

Comezamos cos directos dos recreos do 3º trimestre! Os nosos axudantes seguen a tope os mércores e xoves.

Videoxogos e ciberseguridade

Onte o alumnado de 5º e 6º participou nunha charla sobre ciberseguridade e un obradoiro de creación de videoxogos con Carlos Ces, o informático do Concello de Rianxo. Xa é o segundo ano que Carlos realiza estas actividades no noso cole, e, unha vez máis, pasounos o tempo voando e sacamos moito proveito tanto da charla como do obradoiro. Son dous temas que forman parte do día a día do noso alumnado e das súas familias e aos que non sempre lles prestamos a atención que merecen. 

Grazas, Carlos! 

Dá gusto que veñas ao cole, sempre aprendemos un montón contigo.

Xornal BBS 23

Xa está aquí!

 

Encontro con María Canosa

María Canosa estivo na BBS hoxe pola mañá falando cos nenos e nenas de 1º e 2º sobre O día que choveu do revés e despois cos nenos e nenas de 3º e 4º sobre As pombas de Bastián. Encántanos recibir escritoras na biblioteca, coñecelas e saber como son as escritoras, poder preguntarlles sobre as súas obras e o seu traballo, descubrir curiosidades sobre os libros que lemos... María contounos de novo a historia da chuvia do revés, contestou ás nosas preguntas e ata accedeu a que uns nenos/as de 2º a entrevistaran na Radio BBS. 

Grazas, María! Encantounos coñecerte. 

Grazas Uxía por poñernos en contacto con María.

Mochilas Viaxeiras 12

Hoxe saíron as Mochilas Viaxeiras pasar a Semana Santa nas casas dalgúns de vós. Tedes un feixiño de días libres para gozar delas en familia.😃