Grazas, axudantes da BBS!

Esta semana agradecemos o traballo dos axudantes da BBS deste curso, facéndolles entrega do seu diploma e duns pequenos agasallos. Por primeira vez puidemos xuntarnos os axudantes de 5º e 6º. Mágoa que tiveramos que agardar a xuño para facelo, pero aí están os nosos axudantes ao completo! 

 

Moitas grazas, sen vós a BBS non sería a mesma.

Premio Carballo de Honra

Hoxe o alumanado de 1º e 5º plantou o Carballo de Honra co que a empresa de Boiro, García Sánchez, premiou a Fousas ao Monte  polo seu traballo de conservación e coidado do medio e polas iniciativas educación ambiental que desenvolve en Taragoña e que nós ben coñecemos e compartimos. O carballo está xa a carón do noso cole, da cabuxas e de Michel e Paquita. Agora só ten que medrar forte, os nenos e nenas do Brea habemos coidalo.

 

Parabéns, Fousas ao Monte, por este premio, moi merecido. 

Parabéns, García Sánchez, polo voso compromiso co medio ambiente!

Carballo de Honra para Fousas ao Monte!

Sexto na piscina

Como xa é habitual, dentro das actividades de Educación Física, o alumnado de Sexto está participando nun curso de natación na Piscina Municipal de Rianxo, que se desenvolverá ao longo de catro semanas. Ademais do moito que están a aprender, está claro que o están pasando moi ben. Mirádeos, non hai dúbida! 

 

Grazas aos monitores e traballadores/as da piscina de Rianxo, que sempre facedes que esta sexa unha experiencia fantástica. 

Mercedes Peón

Hoxe a Radio BBS emitiu en directo, no recreo, un programa sobre a artista galega Mercedes Peón. Icía, Iván e Alejandro, de 5º, elaboraron o programa e hoxe estiveron nos micros, descubríndonos a unha das grandes intérpretes da música galega e pinchando a súa música. Na parte técnica estivo Alex. 

A radio é vosa, rapazas e rapaces! Dá gusto!

Mochilas Viaxeiras 16

Hoxe saíron as tres últimas Mochilas Viaxeiras deste curso! Despois de meses de espera Iker, Roi e Dani leváronas para casa. Agardamos que as desfrutedes moito.

Sen burbullas!

Recreos na biblio sen grupos burbulla! Que ganas tiñamos!

Barbanza Rugby Club

Este mércores, 1 de xuño,  os nenos/as de 4º, 5º e 6º tiveron un encontro co Club Barbanza Rugby na área de Educación Física. Tratouse dun encontro que pretendía familiarizar ao alumnado con este deporte tan pouco coñecido para nós. Fixeron actividades de iniciación moi divertidas e diversas: pases, desprazamentos,exercicios de derruba en colchóns, iniciáronse aos ensaios... Houbo nenos/as aos que se lles daba moi ben este deporte, a ver ser alguén se anima e proba a practicalo este verán! 

Moitas grazas ao Barbanza Rugby Club por achegarnos este deporte á escola!

Basket Beats Borders

O xoves pasado o alumnado de 5º e 6º tivo unha charla con Adrián Dios, profesor da Universidade de Santiago de Compostela e membro da Agrupación Deportiva de Baloncesto Fontiñas. Presentoulles o proxecto: Basket Beats Borders O baloncesto derruba fronteiras. Adrián acaba de chegar de Beirut, no Líbano,  onde estivo coñecendo o proxecto e adestrando ao Palestine Youth Basket Team, un equipo de baloncesto feminino formado por refuxidas palestinas do campo de Shatila. Por medio de imaxes e vídeos presentounos a dura realidade de Shatila, pero tamén a incrible experiencia pola que se creou un espazo de liberdade e esperanza para un grupo de rapazas e nenas que teñen no baloncesto unha vía de escape e de superación persoal. 

Para saber máis sobre o proxecto entrade en calquera destas dúas publicacións ou na páxina Basket Beats Borders, paga a pena. 

Reportaxe sobre BBB, contado por Adrián, en Nós Diario 

BBB no xornal El salto diario

Adrián tamén nos falou dos encontros do equipo das adultas con equipos femininos europeos. En xuño estarán en Madrid e está funcionando unha campaña de recollida de cartos para facer posible a viaxe e a estancia. 

Para  colaborar na campaña de finanzamento da viaxe a Madrid no mes de xuño: Basket Beats Borders. Encontro Madrid Shatila. 

Estaremos atent@s ao proxecto e as iniciativas nas que, como centro e comunidade escolar, poidamos participar. 

Grazas, Adrián por descubrirnos un proxecto tan fermoso!

Encontro con Pere Tobaruela

Hoxe Pere Tobaruela estivo na BBS. Comezou falando co alumnado de 5º e 6º, seguiu con 3º e 4º e rematou cos de 1º e 2º. Mañá intensa na BBS! Falou sobre os libros que se leron en cada aula, pero sobre todo falou sobre o seu traballo como escritor e o seu compromiso coa literatura na nosa lingua. Explicounos que cando escribe ten sempre presente como "enganchar" aos lectores/as e hoxe enganchounos a todos/as coa súa charla amena, divertida e cercana. 

Grazas, Pere, polos teus libros e 

polo tempo que hoxe compartiches con nós! 

Seguirémos véndonos nos libros!

Toupiciencia

Hoxe a nosa biblioteca encheuse de ciencia de man da Toupiña e do seu axudante Protonio. Os nenos e nenas de 1º, 2º, 3º e 4º tiveron a sorte de ver o espectáculo da Xanela do Maxín Toupiciencia, no que Protonio realizou para nós tres experimentos, seguindo o método científico, tal e como lle ensinou a Toupiña.  

Foi moi divertido e moi interesante. De seguro que hoxe nas casas houbo quen repetiu os experimentos. 

Grazas, Toupiña e Protonio! Encantounos! 

No Brea xa hai varios científicos e científicas do futuro, seguro. 😉

Grazas, Narciso! Grazas ao Consorcio Editorial.

Todos/as os que quedastes con ganas de máis ciencia e máis Toupiña, tedes neste enlace vídeos de divulgación científica creados pola Xanela do Maxín e protagonizados pola Toupiña. Entrade e seguide aprendendo con Toupiciencia.