Respecto

O grupo de Valores Sociais e Cívicos de 6º elaborou un podcast para a Radio BBS titulado Respecto. É o resultado do traballo sobre o Día da Discapacidade que se conmemora o 3 de decembro. 

Investigaron sobre distintas discapacidades, buscaron temas musicais nos que se falara delas, elaboraron o guión, gravaron e editaron o podcast. Aquí temos o resultado. 

Para todos vós: Respecto

Bravo!

Mochilas Viaxeiras: 6ª viaxe

 

No 2023 as Mochilas Viaxeiras continúan viaxando e levando unha pequena escolma da BBS ata as vosas casas.  Gozade moito delas!

2023

 Xa estamos de volta! A tope desde o primeiro día 😀

Grazas!

Pechamos o mercado solidario felices coa acollida que tivo. Temos que dar as grazas ás familias, que coma sempre, apoiastes a iniciativa da BBS con entusiasmo, e aos axudantes da BBS que se implicaron encantados na actividade: xestionando os trocos, organizando as caixas, revisando e recolocando as mesas do mercado...

Ao longo destes dez días recollemos un total de 386 produtos de hixiene persoal para os campamentos de refuxiados/as do Sahara. Fantástico! 

Estamos felices e moi orgullosas da comunidade escolar do Brea Segade. Grazas!

Na vindeira semana faremos entrega de todo o recollido a Sogaps, Solidariedade Galega co Pobo Saharaui.

Grazas, axudantes!

O casco de Leiro

O alumnado de 6º, está viaxando pola historia da arte, como parte do desenvolvemento do Proxecto Documental Integrado deste curso: De viaxe! A primeira parada desta viaxe foi na prehistoria e non moi lonxe de Taragoña. Investigaron sobre o casco de Leiro e nesta última semana compartiron o seu traballo cos compañeiros/as doutras aulas na biblioteca. Contaron cunha réplica do casco de Leiro que nos deixou o departamento de Cultura do Concello de Rianxo.

Mochilas Viaxeiras: 5ª viaxe

Mochilas Viaxeiras para este tempo de Nadal. Gozade moito delas en familia!

Xornal BBS 25

Puntual na súa cita, saiu o número 25 do Xornal BBS, o último do 2022.

Festival de Nadal da Escola de Música

A Escola de Música de Rianxo fai todos os anos un festival para celebrar o Nadal. Vaise realizar durante dous días: o 18 e o 23 de decembro. A primeira sesión, o 18, foi ás 11:30 no Auditorio de Rianxo. Tocaron o piano, o violín, o violonchelo, o contrabaixo, a guitarra, o coro, o baixo eléctrico e o combo de jazz. 

A segunda sesión, o 23, vai ser ás 20:00 no Auditorio de Rianxo. Tocarán a frauta, o óboe, o fagot, o clarinete, o saxofón, a trompa, a trompeta, o trombón, o bombardino, a tuba, a percusión e os/as pequeniños e pequeniñas da Escola de Música. 

Animádevos a ver as actuacións que quedan!!! 

 Carla Rial (6º)

Ler no Nadal

Entra na publicación e descubre as nosas propostas de lecturas para este Nadal. Preme sobre as portadas dos libros para ter máis información sobre eles e poder escoller «Un libro para agasallar... ou para pedir como agasallo neste Nadal». Boas lecturas!

Lecturas solidarias

Levamos unha semana de mercado solidario e estamos impresionadas e agradecidas coa boa acollida por parte das familias do cole. Nos recreos as/os axudantes da BBS non pararon de recoller produtos, anotar os libros que se convertían en lecturas solidarias e reorganizar as mesas do mercado. Fantástico traballo, axudantes da BBS!

Polas tardes foron moitas as familias que se achegaron para colaborar, así dá gusto! Quédanos tres días máis na semana que vén, se aínda non vos achegastes, non deixedes de facelo.